Acts 17
Polo'e Sailasi'e'mo Tesalonaika taonifi'mo u'ana mai'na'age'anae'mo anamagisayafe'mo hu'naya gemae
1Anakaemo u'ana Amifipolisi taonifi'mo ali'ana atale'a u'ana Apoloniya taoni'e'mo ali'ana atale'a u'ana Tesalonaika taonifi'mo u'ana mai'na'ae. Yu vaya'ai mono no'mo hane'nigeno 2Polo'a nehiya kava huno haino mono nopi'mo lole'e mago'e Sapati afina'mo Goti Mukufi gemo lekana paino alino apaya male'nige'apae'mo agae'e'mo ge huge afige hu'a mai'nae. 3Ani gemo aepa'amo aeno hakalo huno hapa paino'ae'mo, Goti ge'amo alino afole aino atesiyafe'mo Mesaiya ne'mo Goti'a alino ate'nigeno emine'niya vekamo faliteno ago he ti'niye, huno Goti Mukufi hane'niya geleti'mo alino apaya male'niye. Polo'a, Ani ava gemo ae'na hakalo hu'na hapa nepauva vekamo Yesu'a Mesaiya ne'mo mai'niye, huno hapa pai'niye. 4Mago vaya'mogimo ani gemo afite'a Polo ge'ae'mo apakesa afi'a fatago hute'apae'mo anakame hu'nae. Asole Galiki vaya'mogi Gotife'mo mono nehaya vaya'e apaki hane'niya a'nemogi'e'mo e'a lokae'a mai'ne'a ge'animo afi'nae. 5Afi'naya'monanafa apakesa afi'a fatago osu'naya Yu vaya'mogimo apaipa kafa hanaete'a hosu vaya'mo ali'ya'mo o'ali'a afa'a mai'ne'a maketilegamo umenitata hu'a ne'maiya vaya'mo apavale'a ali'a anupa hute'a apavaleli'a u'nage'apae'mo muki taonifi'mo mai'naya vaya'mogi'e'mo apano aete'a apavamusa vale'a Yesoni notegamo u'nae. Apakaemo hu'apae'mo, lole vekala'mo nopati'mo anayate heta anavayu hulita egaune, hu'a hute'a e'nayana 6nopi'mo o'mai'na'age'apae'mo Yesoni'e mago konaga'a'e'mo e'a apayate he'a apavayu huli'a yagai'a ne'apataya vaya'aitegamo e'apae'mo, muki haopalega hanageke kava'mo neha'a vekala'mo manile'mo e'ana mai'na'ageno 7Yesoni'a alino falu fala huno anateteno no'afi'mo anavalelinuno yagaino anate'niye. Muki vaya'mogimo hu'apae'mo, alatimo yagaino nelateya vekamo Sisa ke'aepa gemo ago amagi'a atalete'apae'mo, alu vekamo Yesu'a ala'apimo yagaino ne'apateya vekae, hu'a nehae, hu'a hapa pai'nae. 8Hapa pai'nage'apae'mo muki apano ae'naya vaya'e taonifi'mo yagai'a ne'apataya vaya'mogi'e'mo hapau aite'a lusi kava hu'a apakesa ala'amo afite'a 9Yesoni'e alu vaya'efe'mo, agotimo miya faitetapa viyo, hu'a hapa pai'nage'a miya faitage'a ali'a apatalage'a u'nae.Meliya taonifi'mo u'na'a gemae
10Hani nehige'apae'mo konaga'animogimo Polo'e Sailasi'e'mo ali'a anate'nage'ana Meliya taonifi'mo u'ana ava'yi hu'na'ae. U'ana ava'yi hute'ana Yu vaya'ai mono nopi'mo hai'ana Goti ge'amo hapa pai'na'ae. 11Meliya vaya'mogimo ani gemo afi'nageno apakesamo aino halo ai'nige'a Tesalonaika vaya'mo ae'a apakase'a mago'e hu'a alagepa hu'a afi'nae. Apakaemo muki afina'ae afina'ae'mo Polo'a lama gemo nehifi, hu'a apakesa afi'a Goti Mukufi'mo hane'niya gee'mo kahauya hu'a agege lekana paige hu'a mai'nae. 12Asole vaya'mo apakesa afi'a fatago hu'nae. Asole Galiki a'negi apaki hane'niya a'negi Galiki ve anaga'mogi'enagi hu'a apakesa afi'a fatago hu'nae. 13Ani kava hu'naya'monanafa Tesalonaika Yu vaya'mogimo afi'nayana Polo'a Meliya taonifi'mo uno mai'neno Goti ge'amo aeno hakalo huno hapa nepaiye, hu'a hu'nage'a afite'apae'mo e'a alu ge alu geleti'mo muki vaya'ai apakesa fai'nae. 14Ani kava'mo nehage'apae'mo konaga'amogimo Polo'mo ali'a ate'nageno lamino solovalategamo mai'nige'anae'mo Sailasi'e Timoti'e'mo Meliya taonifi'mo mai'na'ae. 15Mago vaya'amogimo Polo'a avaleli'u'a Atenisi taonifi'mo ate'nageno'ae'mo Polo'a, Sailasi'e Timoti'e'mo egefe hisa'a afina'mo nagaetega malage hutana e'ao, hutapa hana paiyo, huno hapa pai'nige'a atale'a ai'a atagi ne'a e'nae.Polo'a Atenisi taonifi'mo Goti ge'amo aeno hakalo huno hapa pai'niya gemae
16Polo'a anakava mai'neno'ae'mo Atenisi taonifi'mo ageyana muki alo hu'a male'naya yafeke'mo gotitimogimo mai'nae, hu'a nehaya aigofe ya'mo hane'nigeno ageteno'ae'mo hosu aipamo kali'niye. 17Agaemo muki afina'ae afina'ae'mo Yu vaya'ai mono nopi'mo haino hapa pai'nige'apae'mo Yu vaya'e alu nofi vaya'mogimo mono nehaya vaya'e'mo magokepi mai'ne'a ge huge afige hu'a mai'nae. Ani kava'mo huno muki afina'ae afina'ae'mo maketi kumate'mo uno e'a maketile'mo mai'naya vaya'aife'mo hapa pai'nige'a agae'e'mo magokepi mai'ne'a ge huge afige hu'a mai'nae. 18Mago Epikuliya gemo akame nehaya vaya'e Sito'iki gemo akame nehaya vaya'mogi'e'mo e'a Polo'e'mo ge huge afige hu'a mai'nae. Mago vaya'mogi hu'apae'mo, Ani negi nagi tisa vekamo'a haiya agufa gemo hugiye, hu'a hu'nage'apae'mo, Alu nofi vaya'ai goti'apimogife'mo apava gemo aeno hakalo huno hapa nepaiya vekae, hu'a hu'nae. Polo'a Yesufe'mo ava gemo huno'ae'mo, fali'niyateti'mo ago he ti'niye, huno aeno hakalo huno hapa pai'niya'mofe'mo ani gemo hu'nae. 19Apakaemo Polofe'mo, alita anupa huta ne'mauna yategae'mo agi'amo Aliyopagasigayagamo kagaemo eka saufa gemo nehana gemo laha paigeta afigunanagi eno. 20Kagaemo aeto agufa gemo nehana'mofe'mo ani gemo aepa'amo afigefesune, hu'a ha pai'nae. 21Muki Atenisi taonifi vaya'e nata vaya'mogi'e'mo saufa gemo huge afige hu'a maisayafe'mo hapau'niye. 22Polo'a Aliyopagasi kanisole vaya'ai apaulagale'mo he tino hapa paino'ae'mo, Atenisi taonifi vaya'mogitapae, huno, Nagaemo ago lapake'novana lapakaemo lusi kava hutapa mono nehaya vaya'mo mai'nae. 23Lapakae taoni folagapi'mo umenitata nehu'nae'mo mono nehaya yatapimo ago age'nove. Age'novana mago ofalinimo male'netapa alita ne'apamiya hi'yalamute'mo mago avo'mo kae male'naya gemo'a huno'ae'mo,O'age'nona Goti hi'yalamune,
hu'a avo'mo kae male'nage'na age'nove. Lapakaemo ani Gotife'mo mono nehaya'monanafa o'age'nae. Hemenimo ani Gotife'mo nagaemo ava gemo ae'na hakalo hu'na lapa nepauve. 24Goti'a ma mopa'e muki ma mopafi hane'niya ya'e'mo alo huteno koku'nate hane'niya yate'e ma mopafi hane'niya yate'e'mo ne'yagaiye. Vaya'mogi ki male'naya mono nopi'e mono nopi'e'mo no'maiye. 25Goti'a muki ya'amo hane'niya vekamo mai'niya'mofe'mo vaya'mogi mago ya'mo ha mae'a amigafiye. Ha'ao, agai'age'mo hapa maeno apavamusanagi apaune'apamenagi muki yanagi huno ne'apamiye. 26Agaemo magoke vekamo alo hu'niya vekafati'mo alu nofi vaya alu nofi vaya'mo alino afole aino apate'niye. Hogoteno huno'ae'mo, hainu afina'mo maisafi haiyategamo maisafi, huno lekana pai male'niye. 27Agaefe'mo kahauya huta agegesune, hu'a hute'a kahauya hu'a age'a avatesayafe'mo Goti'a ani kava'mo hu'niya'monanafa afagitega no'maifa lahaopale'mo ne'maiye. 28Agae'e'mo lokaeta ne'mauna'mofe'mo afa'a maisuna ya'mo aliteta umenitata huta ne'maune. Mago lagaepati vaya'mogi avo'mo kae'naya vaya'mogimo, Mafa'ne'amo mai'none, hu'a hu'nae. 29Goti mafa'ne'amo mai'nona'mofe'mo, goli yafatetinagi siluva yafatetinagi alu yafatetinagi alo hu'naya vekamo mai'niye, huta lagesa o'afigune. Goti'a vaya'mogimo age'a alagepa hu'a age'ne'a apayateti'mo alo nehaya yakana huno o'mai'niye. 30Akeya'vilaga vaya'mogimo Goti ge'amo o'afi'ne'a negi kava'mo hu'nageno'ae'mo afa'a apakeno apatale'niya'monanafa hemenimo muki haopalegamo ne'maiya vaya'aife'mo, Lapaipamo alitapa afe leyo, huno hapa nepaiye. 31Goti'a agoti huno apatesiya afina'mo lekana pai male'neno agoti huno apatesiya vekamo ago lekana paino ate'niye. Lekana paino ate'niya vekamo'a lama ge'aletike'mo alino alagepa huno agoti huno apategaiye. Goti'a ani vekamo fali'niyateti'mo ago alino he tino ate'niya'mofe'mo muki vaya'mogimo, agoti huno lategaiye, hu'a apakesa afigae, huno hapa pai'niye. 32Polo'a, fali'niyateti'mo ago he ti'niye, huno hapa pai'nige'a afite'apae'mo mago vaya'amogimo hu'a faipa hu'a ate'nage'apae'mo mago vaya'amogimo, Ani kavafe'mo ava gemo mago'e huta afigesune, hu'a ha pai'nae. 33Inagi Polo'a ago apataleno u'niye. 34Mago vaya'amogimo akame hu'a ne'u'apae'mo apakesa afi'a fatago hu'nae. Ani vayapati'mo mago vekamo agi'amo Naiyonisiyasi'a Aliyopagasi kanisole vekagi mago a kanomo agi'amo Namalisi'agi mago'e vayanagi hu'a mai'nae.
Copyright information for
KYG